• Latest News

    August 05, 2016

    Mkataba wa Kessy Simba, mapya yaibuka


    Dar es Salaam
    WAKATI lile sakata la beki wa Yanga, Hassan Kessy likiwa bado halijapatiwa ufumbuzi wa kuruhusiwa kucheza katika klabu yake mpya ya Yanga, jambo jipya limeibuka katika mkataba huo kufuatia maofisa wa Shirikisho la Soka Tanzania (TFF) kubaini kuchezewa kwa mkataba wake uliotoka Simba na kulifanya shirikisho hilo liwe na tahadhari katika mikataba mingine ya wachezaji msimu ujao.

    Kessy alitua Yanga kabla ya mkataba wake na Simba kufikia tamati kufuatia mgogoro uliojitokeza kati ya mchezaji huyo na uongozi wake, hivyo kuamua kuachana na timu hiyo na kuhamia Yanga, hivi karibuni.
    Kikizungumza na Championi Ijumaa, chanzo kutoka TFF, kimefunguka kuwa mkataba wa mchezaji huyo ambao umefikishwa TFF kutoka Simba ni tofauti na aliouwasilisha Kessy.
    Aidha, imeelezwa kuwa, kutokana na hali hiyo iliyojitokeza katika mkataba wa Kessy, imeizindua TFF kuhakikisha wanakuwa makini na mikataba ya wachezaji watakaosajiliwa msimu huu kuhakikisha wanaondokana na matatizo kama hayo kwa kuhakikisha kabla ya wachezaji kupewa mikataba kwanza lazima isainiwe na TFF ili kuhakikiwa kisha ndipo itolewe kwa pande zote husika.
    “Mkataba wa Kessy umechezewa kwa kiasi kikubwa kwa upande wa Simba wenyewe ambao wameuleta hapa ukiwa umefutwa baadhi ya vipengele na kwa upande wa mkataba aliouwasilisha mchezaji na wenyewe una upungufu kufuatia baadhi ya karatasi kutokuwepo, hivyo ni kiasi gani inaonekana kuna mchezo umechezwa pande zote mbili.
    “Hali hiyo imeifanya Yanga kuwa njia panda kwa kutojua mkataba upi ni sahihi hivyo wanahofia kupatwa matatizo zaidi hapo mbele, pia huenda mchezaji huyo akashindwa kucheza msimu ujao wa ligi kuu.
    “Katika mikataba iliyowasilishwa kuna kipengele kinaonyesha kuwa Kessy alikubaliana na Simba kuwa asiruhusiwe kwenda kokote hadi pale klabu yake hiyo itakaporidhia kuondoka, hivyo kwa sasa itakuwa ngumu kucheza Yanga hadi Simba iridhie kumruhusu kwenda kucheza katika klabu yake hiyo mpya.
    “Kutokana na upungufu ambao tumeuona kwenye mkataba wa Kessy viongozi kwa pamoja wameamua kujiongeza kwa kuhakikisha kila kitu kwa sasa kinakwenda kwa umakini wa hali ya juu na ndiyo maana yametolewa maamuzi ya nakala zote za mikataba ya wachezaji kuwasilishwa TFF na kusainiwa kwanza hapa ofisini kabla ya kwenda kwa klabu na mchezaji.
    “Kopi zitakazotakiwa kutolewa ni tano ambapo mara baada ya kusainiwa moja itabaki TFF nyingine atapewa mchezaji na nakala nyingine itakwenda kwa klabu na nyingine zitakuwa akiba ili kuondoa mkanganyiko kama uliojitokeza kwa Kessy ambapo hadi sasa mambo yanaonekana kuwa magumu kwa kushindwa kupatikana ufumbuzi kwa kutotambua mkataba upi ni sahihi.
    “Asilimia ya mchezaji huyo kucheza msimu ujao ni ndogo iwapo uongozi wake hautakubali kukaa na Simba kufanya mazungumzo kwani Simba inahitaji kiasi cha shilingi milioni 130 kutokana na kukiuka kanuni kwa kumtumia mchezaji huyo kabla ya mkataba wake kuisha,” kilisema chanzo hicho.
    Alipotafutwa Ofisa Habari wa TFF, Afred Lucas kuzungumzia suala hilo alisema: “Suala hilo bado halijapatiwa ufumbuzi lakini kuhusu mkataba wake kuchezewa sina taarifa hizo.”
    CHANZO; CHAMPIONI
    • Blogger Comments
    • Facebook Comments

    0 maoni:

    Post a Comment

    Item Reviewed: Mkataba wa Kessy Simba, mapya yaibuka Rating: 5 Reviewed By: 2jiachie Online
    Scroll to Top